香港青聯常務副主席霍啟剛前日出席一個婚禮時，默認太太郭晶晶有喜，啟剛父親霍震霆尋日現身沙田馬場時，亦大方承認就快抱孫，笑言「個仔都話接受你哋嘅祝福咯！」邊講邊露出蓮子蓉咁嘅口面，興奮心情不言而喻喇。我哋問佢乖孫係男定女？打算改乜名？佢就指指個頭話要諗諗先。就快到父親節，問對快將榮升爺爺嘅佢係咪多咗重意義？霍震霆就笑咪咪咁話，「叫做送咗禮物畀Daddy（自己）啦。」
