因突擊探訪諾貝爾和平獎得主劉曉波嘅太太劉霞而被內地國保「一打成名」嘅社運人士楊匡，近日因兩單官司纏身被警方通緝，早幾日喺羅湖入境時被捕。當晚佢透過所謂嘅「匡匡管理團隊」，喺社交網站上載題為「江湖『各』急」嘅更新訊息，向網民緊急撲水四千蚊保釋，成件事嘅過程騎騎呢呢，一度被懷疑係騙局陷阱，究竟成件事係點嘅呢？
楊匡透露，呢個社交網站戶口係由佢同另外五位朋友共用，原本佢唔想將戶口同嚴肅嘅政治扯上關係，所以遣詞用字相對活潑，但係就估唔到會出現極其兒戲嘅「撲水通告」。
佢承諾以後會正經啲看待個社交網站。梗係啦，依家好多傳媒都靠社交網站互通消息，如果有意放料，就應該認真啲。
另外，楊匡早前成功向親密戰友劉沙沙求婚，據聞劉沙沙婚前「有餡」添！不過，楊匡尋日承認「食詐胡」，對於生兒育女未有時間表之餘，短期內亦冇打算申請沙沙來港，名正言順做香港人。
楊匡稱，佢哋打算將戰線守喺內地，擔心一旦連沙沙都做咗香港人，原本已經冇回鄉證嘅楊匡，兩公婆被迫困守喺香港都冇意思囉。