政情：澳洲免學費 PY變心讀醫
醫院管理局行政總裁梁栢賢（PY）今時今日做咗醫生，原來係無心插柳。佢話當初只陪朋友攞表申請移民澳洲，點知到遞表一刻朋友突然「甩底」，自己見唔使錢就交表試吓，最後好好彩得咗，所以喺華仁書院畢業後就飛去澳洲完成預科。就算後來讀醫亦都唔係計劃之內，純粹係因為澳洲學費全免，讀得愈耐就愈着數。
睇印度片減壓
PY話，當初無想過讀醫，因為自己鍾意計數，一心想讀工程，但到後來先知道讀工程要捐車底，唔係好啱佢，佢又覺得自己唔適合做生意：「明明樣嘢賣一蚊，你收人十蚊，有啲過意唔去！」佢又話，最尾揀讀醫係貪佢時間夠長，因為澳洲讀書學費全免，讀得愈長時間就愈着數。澳洲畢業後PY回港最初喺聯合醫院做骨科醫生，但後來因女朋友視網膜脫落，就毅然辭職陪伴左右。
身為醫管局掌舵人，事無大小都關佢事，PY話要減壓除咗做運動外，平日會睇吓日劇同韓劇，就算連聽唔明嘅印度片都會撈埋汁，有時睇睇吓覺得好勵志，仲不禁流下幾滴眼淚，佢話有時人生就係要睇吓觸動人心嘅戲，咁先可以身心平衡喎。