政情：立會火劫後 群蝨亂舞
位於立法會十樓嘅議員長毛梁國雄辦公室兩個禮拜前發生火警，之後救火花灑狂噴，波及唔少議員嘅辦事處，釀成「水災」。火警、「水災」過後，立法會大樓竟然又出現蝨患，偷襲對象係工聯會立法會議員同佢哋嘅辦事處職員。立法會點解咁多災多難o架？
今次蝨患，同長毛同層嘅工聯會陣營六個辦公室無一幸免，一眾議員助理被迫朝十晚六餵蝨，疑似最大蝨主嘅長毛自然被圍剿。估唔到工聯會同社民連呢對鬥氣冤家，由一樓議事廳鬥到上十樓，新仇舊恨炒埋一碟真係唔知點收科。
水浸後嚴重 長毛靠害
長毛嘅議員辦火警引發水浸，都連累到工聯會靠近長毛間房嘅文件檔案濕晒，事後攤晒喺會議室曬足咁耐都未乾得晒。禍不單行嘅係，工聯會十幾個議員助理事後發現，辦事處蝨患愈來愈嚴重，人人被迫朝十晚六餵蝨，咬到周身一撻撻，都咪話唔煩，於是向立法會秘書處反映。
秘書處尋日星期日一大朝早就派外判清潔工上門，先係清洗地氈同天花，最後放置滅蝨炸彈，實行大屠殺跳蝨。工聯會麥美娟話自己同佢嘅助理都有畀蝨咬，有同事仲畀蝨咬到要睇醫生添。鄧家彪就話自己因經常要落議事廳開會而逃過一劫，而跳蝨被「炸一炸」，亦相信已死得七七八八，但房內空氣依然好重化學味，留耐少少都頂唔順，睇嚟工聯會陣營仲有排受，呢筆帳使唔使同長毛算清楚？
張超雄范國威同層冇事
點解突然出現蝨患，雖然鄧家彪冇指名道姓話係長毛做嘅好事，但承認時序的確脗合，自水浸後就愈來愈多蝨，都唔知佢係暗指長毛辦公室原本就有蝨，喺灑水後全部浮晒出嚟，定係濕氣引發蝨患嘞。不過，佢話同長毛辦公室分屬左鄰右里嘅工黨張超雄、新民主同盟范國威反而冇事，完全唔覺有跳蝨出沒，唔通啲蝨都有敵我之分，親疏有別，識得查找目標，針對性發動攻擊？抑或工聯會幾位議員衞生意識不足，惹蝨上門？真係耐人尋味。