中環出更：周振基帶隊吉隆坡搵食
趁暑假旺季未到，商會輪流去旅行聯誼吓，好似雲集商界精英嘅「華都獅子會」，早前都拉隊齊遊吉隆坡。創辦人兼前總監周振基（Stephen）負責帶隊，同行有會長李三元、前總監楊偉誠、張德蘭、名醫鄔揚源等。原來Stephen已闊別吉隆坡十多年，今次同太太重遊舊地，格外開心。李三元就係首次去，感覺新鮮，一行三十人玩轉吉隆坡。
四天逍遙遊，行程好豐富，大家捐窿捐罅搵食，去到亞羅美食街，匯聚廣東、檳城及福建小炒，當然唔放過品嘗人氣小食炭燒雞翼及炒粿條。「掃完街」轉頭再試埋地道肉骨茶及正宗海南雞飯，風味十足。佢哋又參觀國家王宮、湖濱公園、粉紅清真寺，仲有地標雙子塔等。
團友狂掃「情侶肉乾」做手信
臨走前，大夥兒拉隊去當地一間馳名肉乾店，李三元發現一種新款「情侶肉乾」，究竟係乜呢？原來店主用豬肉混埋牛肉一齊做肉乾，好比情侶拍拖喎，咁有創意，團友個個狂掃多包做手信。Stephen回家後將肉乾翻「叮」吃，肉乾飄香。
卓妮