中環出更：鄭錦鐘拉頭馬「弄假成真」
尋日沙田馬場舉行渣打冠軍暨遮打盃賽，唔少熱心行善嘅名人都有嚟湊熱鬧。保良局主席鄭錦鐘（Eric）同太太關巧妍恩愛到場，仲興致勃勃咁拉住隻裝飾嘅假馬影相留念。估唔到願望成真，冇幾耐佢就同德國寶董事長陳國民及藝人陳百祥等老友齊齊拉頭馬，果然善有善報。
友妻愛駒勝出代捧盃
其實今次唔係Eric贏馬，而係佢好友莎莎國際主席郭少明（Simon）太太郭羅桂珍嘅愛駒「美的人生」奪冠，不過咁啱Simon兩公婆齊齊去咗歐洲公幹，於是早兩日已經打定電話畀Eric，叫佢代為捧盃。Eric大爆自己買咗二百元獨贏同五元三重彩捧老友場，帶挈佢贏咗二千多元，認真幸運。
亞洲電視執行董事盛品儒（James）都喺度，佢話前排工作好忙，所以趁周日入馬場輕鬆吓，當捐錢畀馬會做善事喎。卓妮問佢新電視台若獲發牌照，會否對佢哋造成壓力？佢即笑言：「之前已經講咗好多，今日唔講喇。」咁又係，放假係應該放下公事盡情玩嘅！
卓妮又見到工業總會副主席劉展灝（Stanley），佢透露該會將於七月換屆，現正忙於籌組新班底。卓妮聽聞Stanley「升呢」做主席嘅呼聲好高，佢就好謙虛咁話，自己都希望進一步為業界出一分力。原來Stanley喺九七回歸前已經加入該會，擔任副主席將近十年，屬於五位副主席中年資最長嘅一位，最有資格問鼎主席喇。
卓妮