香港廢官當道，垃圾為患，當局準備斥資十八億元擴建將軍澳堆填區，額外提供約六百五十萬立方米堆填容量。面對民間激烈嘅反對聲音，環境局局長黃錦星出嚟解畫，話任何城市都需要堆填設施應付廢物，香港缺乏焚化同轉廢為能設施，如果唔擴建堆填區，遲早會「垃圾圍城」喎。
當局減廢不力，來來去去得兩道板斧，除咗靠呃就係靠嚇，信佢一成，雙目失明。嗱，政府前排啱啱公布源頭減廢、擴大堆填區同興建焚化爐多管齊下嘅所謂「環保藍圖」，第二日就推出擴建堆填區方案，明眼人一睇就知醉翁之意不在酒，藍圖只係障眼術，想轉移視線乘機擴建堆填區就真。可惜呢招未必靈，咪畀功夫茶講中吖，今次擴建堆填區隨時又係跪低收場嘅咋。
查實，擴建堆填區已經唔係第一次跪低嘅喇。三年前當局諗住將清水灣郊野公園一部分闢為堆填區，激起全城公憤，議員紛紛聲討，卒之被迫跪低。依家黃錦星唔吸取教訓不特止，仲一意孤行，重彈舊調，想唔撞板都幾難。
講到底，減廢唔成，垃圾圍城，政府難辭其咎。港產官僚眼高手低，處理廢物唔係靠堆填就係靠徵費，收咗膠袋稅之後食過翻尋味，又建議開徵電器回收稅同膠樽稅，港府自己乜都唔承擔，乜都唔識做，來來去去一味打市民荷包主意，唔激起民怨至奇喇。
至於垃圾分類、源頭減廢就做到唔湯唔水，好似台灣咁，搞到有聲有色，而本港仲用緊最原始最初級嘅「三色桶」回收，廚餘收集基本上等於零，只能夠送晒去堆填區。講到起焚化爐就更加遙不可及，講咗咁多年仲係只聞樓梯響。當局完全冇承擔，一遇到有人反對就縮沙，都唔知仲要拖到幾時。
廢物愈來愈多，唔係市民唔環保，而係官僚唔做嘢。本屆政府弱過弱雞，施政動輒得咎，寸步難行，就算目標幾宏偉，吹得幾巴閉，都係嘥氣嘅咋，以前做唔到，依家更加唔使諗，就算有心做，都無力回天喇。嗱，將軍澳多個屋苑業主組織同社區團體尋日又發起遊行，要求永遠關閉堆填區，甚至話到明如果當局一意孤行，將提出司法覆核添，試問政府又點能夠唔跪低吖？
畏首畏尾空蹉跎，垃圾圍城官之過。本港地少人多，以堆填方式處理垃圾根本就行唔通，惟有多管齊下，弊在政府無所作為，一味等運到，旨意廢官解決垃圾問題，蚊都瞓，蛇都死，香港遲早變臭港嘅咋。