關注高血壓 防治多檢測

在職培訓

珊珊：不講不知，澳門人口少，但血壓患病率處於高水平，若然同內地及美國相比，澳門居民未來十年缺血性心血管病患風險亦處較高水平。知多啲對自己有好冇壞，但個人認為活動只得一次實在太少，未能深入了解，我諗喺骨場搞個在職培訓，等技師學識晒後就可以幫助到大家啦！

雅琪：我懷疑你前世未讀過書或工作太悠閒，先會覺得仲有時間去學習高血壓知識。好似我咁，平日做到得番半條命，莫講話知道自己有高血壓唔知點醫，就算真係有高血壓我都冇時間去醫啦，計我話，應該係有關當局得閒就派員過嚟幫我哋量下血壓，咁咪大家都好囉！

雅琪認為健康問題應該閣下自理，作為技師無榷過問！

珊珊關注高血壓患者年輕化，認為骨場有需要免費幫人客檢查喎！

珊珊：你實在太短視，雖然搵錢好重要，但冇健康又點搵錢呢？老生常談唔想多講，但我之所以咁留意高血壓病，首先係病者愈來愈年輕化，其次我哋從事揼骨按摩，唔了解人客健康狀況，玩得激好易出事o架！

雅琪：我話你諗多咗至真，澳門十步一骨場，年終世界各地有咁多不同年紀男人入場梳乎，如果發病率咁高，咁輕易就出事，班投資者就情願唔搞骨場搞墳場啦！要技師去學習醫療知識冇問題，但畢業後係咪人工都會有所提升先？

健康檢查

珊珊：如果人人都好似你咁功利，又鍾意膽博膽嘅咁就大鑊，首先學識多樣嘢對自己冇損失，又可以幫到人，何樂而不為？人客如果真係有事仲會多謝你提點添！其次從外表好難睇得出一個人有冇高血壓，如果當正常人咁服務，出咗事先後悔實在太遲，自己都唔心安啦！

雅琪：照你咁講，莫非每個人客入場都要量血壓，填份健康問卷先可以入房歎？咁澳門骨場仲使做生意嘅？既然你咁鍾意學習健康知識，又享受幫人，不如過隔籬正骨場一展所長啦！

珊珊：你點醒咗我，其實馬交咁多骨場，而揼骨都屬於保健活動，我覺得可以搞個簡單免費健康檢查，若然人客認為有需要，技師可以入房時幫手量血壓，或做一啲基本檢查，呢點一定好受人客歡迎，仲可以幫骨場吸納唔少生意添！

雅琪：都費事同你癲，今日就話高血壓患者愈來愈多，假如聽日話脫髮愈來愈嚴重，陽痿愈來愈年輕化，唔通技師又要身兼輔導員，去幫人客檢查，咁不如陪埋佢哋睇醫生，餵埋佢哋食藥吖好冇？

珊珊Profile：

三圍：34-24-33

身高：5呎2吋

雅琪 Profile：

三圍：34-22-33

身高：5呎3吋