政情：捐贈遺體 高永文掙扎
一向以宣揚大愛精神為宗旨嘅泰山公德會，會長陳英傑尋日連同其夫人及八位會員一同簽字，決定死後將遺體捐贈予香港大學醫學院解剖系，做教學及醫學研究之用，食物及衞生局局長高永文都有出席見證儀式。高永文話，依家願意喺死後捐出遺體嘅人愈來愈少，令唔少大學醫科學生，上解剖堂時都唔夠遺體用，可能過多三至五年就要靠電腦模擬圖，取代真實嘅遺體。
已簽器官捐贈卡
本身係骨科醫生嘅高永文自從上任局長後，除咗日以繼夜處理政策措施，又要留意傳染疫症情況，可能忙到連瞓覺都冇時間，但佢依然關心學生將來無人體器官做解剖實習，即場自爆早年已簽咗器官捐贈卡。不過，問佢會唔會效法陳英傑咁捐贈遺體，佢就笑住話：「仲掙扎緊！」究竟高永文掙扎緊乜呢？佢就好神秘話：「掙扎完先話你知。」莫非高局長比較保守，有死後要留全屍嘅傳統觀念？