政情：立會搶光手語傳譯員？
立法會年初引入手語即時傳譯服務時係威係勢，原本打算分階段將服務擴展至內務委員會及財務委員會，但據聞招標反應麻麻，加上早前「拉布四子」拉布拉足四星期，幾個手語傳譯員被迫陪佢哋加班，難怪冇人肯捱義氣去做。有手語傳譯員就向我哋訴苦，話行內嚴重缺乏人手，情願將資源撥去醫院協助聾人睇醫生，都好過幫立法會傳譯，唔通立法會今鋪好心做壞事？
全港僅十人合資格
第六屆「香港人道年獎」頒獎禮尋日舉行，其中獲獎嘅中文大學手語及聾人研究中心主任鄧慧蘭，自九十年代推動以手語同口語為本嘅雙語教學模式，提升聾人知識水平。
不過，在場提供即時傳譯服務、來自香港聾人子女協會嘅手語傳譯員，提起立法會引入手語傳譯就唔多歡喜，佢哋話全港合資格嘅手語傳譯員只得十個，但法庭同立法會已搶去全港僅餘嘅四個全職員工，全港有七千個聾人日常需手語傳譯服務，大呻聾人連睇病都好難同醫生溝通，邊有閒情理班議員講咩？咁講法，立法會係咪應該擱置擴展呢項服務呢？抑或議員幫佢哋爭取資源培訓更多手語傳譯員呢？