政情：大反派泛民東北做騷
新界東北發展計劃（下稱計劃）爭議不絕，立法會申訴部早前仲接到有市民反對計劃嘅意見，於是安排八名議員尋日落區實地視察及聽取民意。班議員用咗約五個小時走馬看花咁去咗八個地方視察，沿途有正、反兩面嘅聲音，但竟然冇泛民議員接收支持計劃嘅市民意見書，當去到較多支持者嘅打鼓嶺鄉事委員會時，班泛民仲突然話有要事做，要中斷行程。究竟班泛民議員係真心聽意見吖，抑或一心落區做場大龍鳳反對計劃呢？
遇反對者即蒲頭抽水
今次落區嘅八名議員包括陳志全、劉慧卿、梁家傑、范國威等，朝早由立法會坐專車出發，首站先去古洞北石仔嶺，逾五十名支持及數十名反對計劃嘅市民已在場守候。當議員到達後，市民就高叫口號，支持嘅一方要求政府合理賠償、原區安置，而反對嘅市民就表明不遷不拆，要政府撤回計劃。議員逗留十分鐘，就乘坐專車轉到塱原、粉嶺虎地拗村及天平邨等地，沿途支持及反對計劃嘅聲音參半。
期間林大輝及鍾國斌因有會議與梁國雄分別提早離開，其他議員就繼續行程，直至到達坪輋大埔田及元下村時，在場聚集咗近七十名反對計劃嘅市民，佢哋大叫口號要求政府撤回計劃，仲猛打貼有高官相片嘅稻草人公仔。反對聲勢咁浩大，班泛民議員又點會錯過抽水機會吖，於是順勢輪流發言，批評政府做唔夠諮詢，又要求撤回計劃，仲不時質問出席嘅發展局及規劃署官員點解要發展新界東北。
不過，正當大家準備前往較多支持者嘅打鼓嶺鄉事委員會時，唔知班泛民議員係咪收到風，突然話有要事趕住走，所以腰斬呢段行程。其實班議員都用咗半日去咗咁多地方，照計去埋最後一站都唔會嘥好多寶貴時間啫，再加上有上水鄉人士投訴泛民議員唔肯接收佢哋嘅請願信，又唔聽佢哋嘅意見，批評泛民主派唔知乜嘢叫做民主，咁好難怪有人懷疑佢哋落區視察係為咗做騷反對計劃嘅。