中環出更：漫步九龍城 季玉年緬懷舊香港
咪以為名人淨係鍾意行中環置地廣場、ifc之類大商場，其實都有另類一族。好似著名收藏家兼畫廊董事總經理季玉年（Catherine），就鍾意行九龍城雜貨舖同旺角樓上書店。佢慨嘆繁華香港背後，舊式建築買少見少，人情味愈來愈淡，寧願穿梭舊區大街小巷，尋回真正嘅香港情懷。
Catherine除咗收藏名畫外，仲熱愛攝影。佢早前出席喺港大美術博物館舉行嘅攝影展時話，佢最想影嘅，唔係中環、尖沙咀或長洲，反而係九龍城，貪佢夠晒懷舊喎。
愛旺角樓上書店
Catherine慨嘆，香港名廈林立，富貴十足，卻失去香港原有特色風味，要走到去九龍城，先搵番丁點舊香港味道。
所以佢一有時間就貢去九龍城雜貨舖，買吓潮式甜品，開心到極。除此之外，唔少人嫌嘈嘅旺角，都係佢「飛佛」，最愛行上樓上書店打書釘，回味當年讀書時，經常相約同學上到書店睇詩集同文學書籍嘅日子，真係清純過蒸餾水。
卓妮