中環出更： 田二少黃雨嫁女星光不減
立法會議員田北辰（田二少）尋日家有喜事，三女田植鏘（Lavina）披上嫁衣，與金融才俊許建邦（Jonathan）拉埋天窗，一對新人早上於中環聖約翰座堂行禮，夜晚再到尖沙咀洲際酒店設宴。雖然教堂婚禮遇着黃色暴雨，但一眾高官及政商界名人仍冒雨到賀，包括香港青聯常務副主席霍啟剛同太太郭晶晶、中港攝影集團主席孫大倫夫婦、著名珠寶設計師羅啟妍、立法會議員林健鋒夫婦等。
自稱「榮升外父V1.0」嘅田二少，尋日笑到四萬咁口，佢話幾個月前已為Lavina人生大事緊張萬分，前晚一家人仲傾咗成晚，唔捨得瞓。佢話，呢粒女同佢最親，皆因佢經常睇文件忙公事，晚晚搞到凌晨三、四點先瞓，咁啱Lavina都係夜貓族，所以兩父女不時食消夜打牙骹。佢好感慨話，愛女嫁咗之後，半夜都唔知搵邊個陪佢好喇！
啟剛默認晶晶有喜？
講到夫婦相處之道，田二少坦言，Lavina做事有要求，Jonathan就好有理想，兩人謹記互諒互讓。佢又大讚女婿醒目得嚟又純品，目光夠遠大，仲要同囡囡一樣係基督徒，認真襯到絕。問佢急唔急抱孫？佢就話唔使催，囡囡結婚都係為咗生BB啫！
至於屢傳有孕嘅霍家新抱郭晶晶，尋日就着住鬆身衫拖實老公霍啟剛入場。卓妮上前恭喜佢哋，啟剛就對太太懷孕傳聞不置可否，只係笑住回應：「不如咁講，我哋會接受你哋嘅恭喜同祝福！」咁講似乎默認真有其事喎。卓妮同場仲見到發展局局長陳茂波、政制及內地事務局局長譚志源、勞工及福利局局長張建宗、前教統局局長李國章、前議員梁劉柔芬等都有觀禮。
卓妮