俗語話，好嘅唔靈醜嘅靈。北大人曾警告香港遲早車毀人亡，好多人認為係危言聳聽，其實，唔怕一萬，最怕萬一，今時今日嘅香港烏煙瘴氣，官德敗壞，大有大貪，細有細貪，連廉政公署嘅金漆招牌都蒙污，簡直七國咁亂，車毀人亡又何足為奇吖！
嗱，唔係亂噏o架，天水圍前日下午就發生輕鐵出軌意外，你都咪話唔驚。件事係咁嘅，一列由天水圍駛向元朗嘅「雙車卡」輕鐵，喺駛經一個路軌交匯處急彎時，懷疑車速太快及車卡轉彎時間唔夠，兩卡車前慢後快，後卡追撞前卡，前卡被炒起出軌傾側，車尾轉向架仲飛脫添，搞到乘客慘變人肉骰仔，總共七十七人受傷，其中十五人傷勢嚴重，依家仲有多人留醫。唉，好哋哋一列輕鐵行行吓居然會自炒出軌，真係講都冇人信！
每次港鐵出事，港府例牌要求提交報告，今次當然亦唔例外。運輸及房屋局局長張炳良就話嘞，呢次出軌事故嚴重，當局非常重視，已促請港鐵內部調查，盡早提交報告；佢仲話，根據新票價調整機制，港鐵延誤要罰款，今次延誤服務超過八小時，如證明港鐵有責任，可被罰款一千五百萬元喎。
即係咁，錯就要認，打就要企定，輕鐵出軌咁大件事，梗係要調查原因追究責任喇。但講到底，預防勝於治療，調查又好，交報告又好，甚至罰款又好，都係亡羊補牢嘅啫，最緊要係點樣先至可以防止意外發生吖嘛。試諗吓，今次冇搞出人命，總算係不幸中之大幸，但下次仲會唔會咁好彩呢？列車出軌喎，後果可大可小，唔係講笑o架！
係人都知，港鐵收費一流，但管理就完全唔入流，搞到事故幾乎無日無之，唔係訊號系統故障就係電纜出事，唔係車廂有問題就係路軌有裂痕，簡直無奇不有，乘客不勝其煩。依家仲發展到出軌添，點知下次又會發生乜嘢事吖。
話時話，港鐵事故頻仍，管理層固然有責任，而港府亦難辭其咎嘅啫。撇開大股東嘅身份唔講，港府作為監管者，監管不力又該當何罪呢？嗱，唔好以為要求港鐵提交報告就盡到責任，次次出事，次次交報告，結果咪又係得個吉。正如古人話齋，禁而不止，則刑罰侮。港府再唔加強監管，督促港鐵改善管理，提高服務水準，無論點樣調查及交報告，都係嘥氣嘅咋。
總而言之，事故一單都嫌多，港鐵唔好淨係識加價至得o架。北大人嘅車毀人亡論無疑有啲危言聳聽，但如果港府及港鐵唔吸取教訓，邊個敢話唔會一語成讖呀！