政情：立會足球隊連勝斷纜 泛民「黑腳」幫倒忙
立法會同政府官員尋日又踢足球友誼賽，立法會一向靠外援入波，照計應該坐定粒六贏波，可惜全場僅存嘅三個泛民主派議員，包括資訊科技界莫乃光（Charles）、胡志偉同梁國雄（長毛），個個輪流幫隊波倒米，最後只能追和二比二平手，令立法會無緣創出連續十八場勝出紀錄。
長毛茅招「插水」
立法會過去全靠請槍，先達成連贏十七場嘅不敗神話，隊長陳克勤今次一口氣請咗十個外援，但對內只係搵嚟七個成員落場。建制派除咗佢，得番黨友梁志祥、漁農界何俊賢及工聯會郭偉強，僅僅過半數組成足球隊。
不過，最唔爭氣都要數泛民隊員，Charles廿幾年來首次落場，踢唔夠廿分鐘已經冇力。胡志偉開波冇耐就足球小將戴志偉上身，帶住個波如入無人之境係咁扭，可惜係對住自己個龍門猛衝，要場邊隊友搏命嗌先截得住佢；其後佢仲踢到對波鞋成個鞋底爛到反起咗，枉佢仲笑到見牙唔見眼。
到下半場先現身嘅長毛，甫落場就出動「鉸剪腳」，之後仲表演「插水」兼累街坊，差啲要罰射十二碼，長毛嘅招數似乎同佢嘅「拉布」戰術一樣咁無賴喎！