政情：小儀煮「西瓜皮」 林鄭星爺硬食
消減廚餘係現屆政府環保政策嘅重中之重，由環境局局長黃錦星（星爺）牽頭嘅惜食香港運動督導委員會，尋日終於啟動醞釀多時嘅全港減少廚餘運動，仲搵埋政務司司長林鄭月娥撐場，而近期喺街頭食盡四方美食嘅阮小儀（小儀）就示範點樣用廚餘製作佳餚。點知大會竟然大整蠱，預備咗啲未刨乾淨嘅西瓜皮，同未解凍嘅豬肉招呼兩位高官，睇到台下觀眾嘩嘩聲。
廚餘加熱博過骨
唔知大會係咪見台下反響太大，小儀即時拿出另一碟因為「時間關係」而預先煮好嘅「西瓜皮」同豬肉，以為簡簡單單加熱就過骨，但賣相始終唔太討好。林鄭同星爺上台試食嗰刻都猶豫咗一陣，但始終都要試吓，雖然兩人一致死頂笑笑口，但臉上嘅難為真性情卻表露無遺，只得小儀自high食唔停口。
星爺事後自爆平日太忙，好少煮飯，間唔中放假先同太太輪流玩吓煮飯仔，但都係簡單菜式為主。佢又話，呢味「西瓜皮煮豬肉」勾起唔少童年回憶，當年屋企人成日用柚皮、橙皮入饌，依家諗起都食過翻尋味，估唔到星爺原來細細個已經為消減廚餘出力。