政情：資深AO跳船 政府斷層？
公務員薪酬趨勢調查日前曝光，公務員加薪數字跑輸通脹，唔知會否觸發新一輪「跳船潮」，特別係近年資深嘅政務官（AO）離開官場「熱廚房」已經蔚然成風，除咗加盟公營機構搵真銀外，最新走勢係轉投商會懷抱，好似四大商會之中，其中三個係由前資深政務官出任行政總裁。政府輸出人才後最少要三、五、七年先有相等資歷嘅人才補上，睇嚟當局都要正視吓呢個現象喇。
政府廚房愈來愈熱，近年唔少服務政府多年嘅資深政務官「跳船」，早年落腳點首選薪高糧準嘅公營機構，好似○六年離開政府嘅馮永業，短短七年間先後到生產力促進局同機場管理局工作。曾任旅遊事務專員嘅方舜文早年亦跳到貿易發展局做副總裁，佢哋都算係較早另謀高就嘅一批資深政務官。
及至近年資深政務官跳槽走勢出現變化，連四大商會都出現佢哋嘅足迹。前政務司司長唐英年嘅「愛將」袁莎妮前年接替提早離職嘅方志偉做總商會總裁，成為總商會成立以來首位女總裁。其後曾出任司長新聞秘書、又做過政府多個部門嘅蘇家碧，經過逾半年高官再就業「冷河期」後，今年初終於坐正做工業總會嘅行政總裁。
最新投入商會「大內總管」行列，就係去年六月底離開政府嘅前政制及內地事務局副局長黃靜文，消息話佢會喺七月一日正式履新中華廠商聯合會行政總裁。計落條數，目前四大商會中，只有中華總商會係未有資深政務官加入嘅老牌商會。
傳潘太平亦離熱廚房
至於新政府上場後有乜資深政務官離開熱廚房呢？據聞曾做過唐英年新聞秘書嘅陳維民，早兩個月正式過檔到金融管理局出任助理總裁。最新消息話，曾任特區駐成都經濟貿易辦事處主任嘅潘太平亦會離開政府，有傳佢會到香港賽馬會慈善信託基金幫手，睇怕政府真係要諗吓計點提升資深政務官士氣，否則個個排住隊「跳船」，出現斷層時先諗補救方法就太遲喇！