中環出更：徐立之爆母為愛棄學
唔少家長都禁止子女喺求學時期談戀愛，擔心佢哋掛住拍拖影響學業，原來香港大學校長徐立之嘅媽咪，當年亦曾因為愛情而放棄學業。徐校長前日獲上海復旦大學頒授名譽博士學位，佢喺典禮上致詞時，大爆媽咪曾經係復旦學生，但為咗愛情而無法繼續學業，事後非常後悔。佢笑稱，今次回到「老家」並獲頒發榮譽，總算為媽咪完成咗個心願喎。
獲復旦名譽博士償母願
身為遺傳學家嘅徐立之講得一口流利廣東話，但其實佢係喺上海出生，後來跟隨父母來港落地生根，先後取得中文大學學士及碩士學位，以及美國匹茲堡大學哲學博士。今次徐立之獲得復旦大學名譽博士學位，係為咗表揚佢喺人類基因組研究領域作出嘅貢獻，特別係對抗沙士疫症上嘅重要研究，以及擔任港大校長期間成功地改革教育，令大學獲得良好嘅國際聲譽。
卓妮