四川雅安七級大地震，捐款賑災搞到一鑊粥，講來講去其實係三個字：反貪腐。香港人不值內地貪官所作所為吖嘛，為咗避免善長仁翁淪為腐敗官僚嘅提款機，所以有人發起反捐款運動，呼籲香港人唔好再做傻仔。勢估唔到嘅係，一向號稱廉潔奉公嘅香港社會，尤其係以肅貪倡廉著稱嘅廉政公署，居然會被揭發一連串有違廉政原則嘅奢華事件。
繼本報獨家踢爆前廉政專員湯顯明在任期間亂揈公帑，豪花幾百萬元外訪同埋以二十二萬元公帑瘋狂送禮之後，審計署亦發表報告，狠批廉署巧立名目逃避開支限制，導致酬酢開支嚴重超標。立法會議員趁審議財政預算案開支嘅時候，迫使廉署交代湯顯明嘅送禮清單，發現禮物種類包羅萬有，包括水晶模型、花坑石擺設、雕刻擺設、圍巾、領呔、手錶以及相機等等，簡直五花八門，林林總總。
大家心知肚明啦，送禮往往等於行賄，尤其係禮尚往來嘅中國官場，禮物送來送去無非為咗打好關係，方便大家你關照我時我關照你。好衰唔衰嘅係，湯顯明大部分嘅送禮對象都係內地政府部門同官員，令人懷疑佢想打通中國官場嘅任督二脈。唔知係純粹巧合定係乜鬼嘢，湯顯明卸任廉政專員之後，獲委任為政協委員喎，當中有冇牽涉到利益轇轕呢？
廉署不廉嘅指摘接踵而來，廉署於二○一○年十一月及十二月兩度喺本港五星級酒店宴請內地官員，其中一次宴會嘅賓客係來港答謝港府捐錢賑濟汶川地震嘅四川高官。兩次豪華宴會合共消費接近八萬元，人均消費一千二百元，遠遠超過廉署酬酢人均四百五十元嘅上限，比審計報告揭發嘅兩次更加離譜。
簡單咁講，廉署違規利用公帑大吃大喝，湯顯明唔止係知道得一清二楚嘅宴會主人家，更加係批准超額花費嘅拍板人！
唉，墮落呀墮落，呢鋪真係千年道行一朝喪。開講都有話啦，其身不正，雖令不從，既然廉署都好似內地貪官咁樣公款私吃，試問又點樣打正旗號肅貪倡廉？
所以話啫，捲入貪腐醜聞嘅前特首曾蔭權爵士，以及帶頭以奢華作風教壞廉署嘅湯顯明真係沆瀣一氣，鬼叫呢兩個老拍檔都係公務員出身嘅難兄難弟咩。亦難怪輿論質疑貪曾受到廉政專員包庇，所以廉署話就話正在針對貪腐醜聞展開調查，不過遲遲都未有任何實際檢控行動，話唔定拖得兩拖之後就不了了之。
計功夫茶話齋，現任廉政專員白韞六唔該做番兩齣好戲，第一齣叫做嚴拿貪曾，第二齣叫做棒打貪湯。萬一白韞六投鼠忌器，香港賴以自傲嘅廉政遲早破產o架咋！