估唔到貪曾下台成年，其影響力仍如百足之蟲，死而不僵，真係點到你唔服！
曾有議員指摘過貪曾：不賢而在高位，是播其惡於眾也。果然今朝都到眼前來，禍港七年嘅貪曾遺下無數爛攤子，今朝政府，睇怕要「穩中求變，適度有為」，都要搲甩幾撮頭髮！
眾所周知，貪曾除了貪遍省港澳，舔到盡外，更鍾意做離岸特首，以公帑豪住總統套房，發其春秋大夢；是以在任利民紓困政策即使欠奉，可吹水治港之功夫天下無敵，其好大喜功威過秦始皇、醒過隋煬帝，甚至叻過清朝乾隆皇。
乾隆有「十全武功」，貪曾有「八大工程」，數目上好似稍遜一籌，未湊夠「十大」，皆因「八」字諧音「發」，好意頭而已！貪曾想必飲恨自己做特區一把手，未能做夠「八」年，才搞到自己下台仍七國咁亂，繚亂春愁如柳絮，霉運糾結，揮之不去！
言歸正傳，話說貪曾禍港七年，民間團體107動力調查發現，呢位爵士任內嘅八大工程，合計超支逾四百億元，如果連西九最新建築估價達五百億元計，則八項超支可能逾六百億元。如今要全港市民填氹，你都咪話唔甘！
從貪曾身上，老朽只能嘆息，一個好大喜功而浮誇無能嘅人，必定目光如豆，眼前盡是自己的利益，舔到盡之餘又愛植黨營私，其「愛將」前廉政公署一哥湯顯明一手弄污廉署「肅貪倡廉」嘅招牌，貪威識食、愛外遊兼勁用公帑送禮，有晒貪曾嘅影子！
貪曾任內劣迹斑斑，用人唯親，彰彰明甚，「居處足以聚徒成群，言談足以飾邪營眾」，香港回歸後出了個貪曾，埋下咁多地雷，想唔風雨飄搖，睇怕要黃大仙顯靈矣！