「貪曾」前特首曾蔭權爵士同佢嘅愛將前廉政專員湯顯明，先後被揭喺任內豪花公帑、瘋狂外訪，被立法會各黨派議員狠批。不過，班議員似乎只係講就一套，做又另一套，事關立法會扶貧事宜小組委員會密謀喺今年暑假，用公費出訪遠在北歐嘅芬蘭同瑞典考察。究竟班議員真係有心去考察當地嘅制度，定係為外訪而外訪，仲要有咁遠去咁遠，真係好值得商榷囉！
根據扶貧小組嘅諮詢文件，小組曾經考慮過九個選定地方進行外訪，包括多個亞洲國家同城市，但最後都係建議去芬蘭同瑞典，原因係兩地早已出現嚴重人口老化，喺呢方面嘅經驗比其他地區豐富喎。以六日行程計算，估計每名議員使費需要約二萬六千元至四萬五千元，假設有十個議員成行，計埋秘書處啲支援人員，又肯定要花幾十萬元公帑。
眾所周知，芬蘭同瑞典都係稅率極高嘅福利主義國家，同香港奉行嘅低稅制同資本主義幾乎完全相反，大家嘅政治同社會文化亦好唔同，對方嘅政策同制度對香港有幾大參考價值，真係好成疑問。不過，正如貪曾同湯顯明外訪一樣，立法會議員用公費外訪都係「自己批自己」，納稅人無權出聲。