社民連梁國雄與人民力量三子黃毓民、陳偉業同陳志全大玩「拉布」戰，針對財政預算案提出七百多項修訂，希望迫使政府制訂落實全民退休保障。不過，呢場拉布戰未癱瘓到政府，就先癱瘓立法會，多個委員會同小組嘅會議被迫取消或押後，其中一個會議正正係用嚟討論全民退保嘅。今次長毛拉布就好似用緊武俠小說中嘅「七傷拳」，一出招就傷到自己。
為咗遷就立法會要加開大會迎接拉布戰，至今已最少有五個委員會嘅會議或活動要取消或押後，當中包括原定喺明日舉行嘅福利事務委員會特別會議。該次會議嘅其中一項議程係「香港退休保障的研究」，邀請咗幫緊政府扶貧委員會做相關研究嘅社福界學者周永新出席，依家成個會要押後到五月中舉行。
其他受影響嘅會議同活動，包括食物安全及環境衞生事務委員會因應禽流感到公眾街市嘅視察行程、立會相關小組就空氣質素指標、鐵路發展優化方案同少數族裔居住問題舉行嘅公聽會等，即係除咗官員同議員之外，之前報咗名出席會議發表意見嘅市民同民間團體都受牽連。
香港近年發展慢過烏龜行，都唔係冇原因嘅。