政情：張震遠怨貪曾留蘇州屎
市區重建局主席兼行政會議成員張震遠尋日應亞太台商聯合總會邀請演講，題目係講「香港夢」，但內容其實同夢冇乜關連。
佢一開始話自己有個夢，係想全香港人都安居樂業同開開心心，眼見依家有港人居住環境仲停留喺第三世界水平，所以好希望改變現實。佢講講吓就講到佢老本行，即係市建局，例如佢話市建局經過多年努力，唔少舊樓居民一知道市建局收樓，即刻拉行橫額歡迎佢哋，又話平時開居民大會亦會全體鼓掌，令佢好感動喎。
有一點佢講得好啱，就係話香港現時咁多人冇樓住，都因為以前政府做得唔夠好，過去七、八年公屋落成量遠低於指標，亦冇復建居屋。雖然佢冇點名邊個做得唔好，但擺明就係暗批「貪曾」前特首曾蔭權爵士在任時冇做好房屋政策，先至令小市民依家有咁大怨氣。