港島鴨脷洲海怡半島早前發生四級大火，暴露屋苑大廈緊急通道狹窄同消防設施保養不足等潛藏消防風險。立法會保險界議員陳健波尋日就向當局提出一條書面質詢，要求政府考慮成立專家小組，深入研究消防設施失效問題。陳健波透露，自己持有海怡半島物業，又話發生火警嗰棟大廈正正就係佢物業嘅所在地。莫非佢嘅單位受到火警波及，所以要喺立法會跟進？
陳健波解釋，火警發生時佢身處立法會，知道事件後即時大吃一驚，打電話畀地產公司跟進。後來知道火警波及嘅係低層單位，而佢持有嘅單位就位處三十幾樓，加上坐向唔同，所以冇受今次火警影響。
佢話並非因為事件同自己有關，所以先喺立法會跟進，而係因為經過今次事件，佢諗到香港大部分單位至少都有二十層高，如果高層單位發生火警，而佢哋嘅消防系統臨時壞咗，消防員就要由地下拖喉灌救，會阻延救援工作。
陳健波仲話，佢持有嘅單位喺發生火警前已經出租，但就未簽臨時買賣合約，而租客亦都冇因為火警而臨時「撻訂」，總算有驚冇險。