政情：民主阿婆 吹雞搞局
前港區全國人大代表吳康民（康叔）前日撰文，踢爆「民主阿婆」前政務司司長陳方安生係港英餘孽嘅第一梯隊，更有意成為泛民主派共主，只可惜「氣數已盡」。話口未完，民主阿婆尋日就率領一班港英舊電池，宣布成立名為「香港2020」嘅政改平台。睇真啲，六位成員都係○八年民間策發會嘅舊面孔，今次更連白鴿黨同公文袋都唔撐，睇嚟民主阿婆今次要盡用舊電池盡地一煲。
民間策發會變種版
民主阿婆年前大鑼大鼓成立民間策發會，可惜煲極都煲唔起，尋日佢再次吹雞，發起猶如民間策發會變種嘅「香港2020」，支持二○二○年達致行政長官、立法會雙普選。五位核心成員包括前立法會及行政局議員李鵬飛、港大法律學院院長陳文敏、前大律師公會主席李志喜、「鬼佬民主會」民促會副主席高德禮（George Cautherley）同前經濟司布簡瓊（Elizabeth Bosher）。當年戰友白鴿黨單仲偕、公文袋郭榮鏗就離隊走人，睇怕民主阿婆想要成為泛民共主嘅好夢難圓。
民主阿婆眼見「佔領中環」同真普選聯盟佢都冇份埋堆，決定將平台改頭換面，並以關注商界聲音作為唯一賣點。政治能量已經所剩無幾嘅民主阿婆，仲臨時臨急硬推喺內地有兩間廠房嘅高德禮為「商界代表」，號召力弱到連四大商會都唔派代表撐場，唔知平台係代表邊方面嘅商界？
資金來源未肯透露
雖然民主阿婆聲言對政改方案冇既定立場，仲話希望可以同中央溝通，事關中央似乎唔相信港人能夠有智慧選出鍾意嘅特首，但佢相信港人選出嘅特首絕對唔會同中央對着幹，佢仲開口埋口要求方案底線要符合《公民權利和政治權利國際公約》兼且一人一票真普選。至於佢對佔中嘅睇法亦相當曖昧，只係再三強調，會視乎特首方案係咪得到大多數港人支持，連自己會否考慮佔中都封口不提，不禁令人質疑民主阿婆想藉呢個平台有乜陰謀詭計。
對於康叔嘅指控，民主阿婆語帶激動批評對方「陰謀論」，多次提起贏出○七年立法會港島區補選嘅舊聞，力撐自己得到大部分港人支持，又自稱做人「不偏不倚、不卑不亢」，絕對唔會受外來勢力阻撓咁話。不過，當被問到「香港2020」嘅資金來源，民主阿婆除咗聲稱會自掏腰包支持外，就唔肯透露半點風聲。其實「香港2020」定位模糊，加上呢班舊電池連回收都冇乜價值，與其重蹈當年民間策發會嘅覆轍，倒不如唔出嚟獻世好過啦！