中環出更：標準工時 幟哥怕怕
繼最低工資實施後，政府又開始醞釀為標準工時立法。卓妮日前喺馬場遇到飲食達人「幟哥」黃永幟，佢話政府有意改善勞工待遇，但亦要顧及經營者嘅處境，否則標準工時可能會對飲食業構成傷害。佢話，倘若定立標準工時係每日八小時，食肆老闆就要為一天工作十一小時嘅員工付出三個鐘嘅超時工作補水。
員工OT 薪酬成本增
如果計吓條數，幟哥話，若以日前勞工界主張超時工作補水應獲一點五倍來計算，食肆老闆就要為此多付百分之十幾嘅人工，呢條數一定會為食肆老闆帶來經營壓力。幟哥慨嘆，喺通脹環境之下，好難將人工升幅轉嫁於消費者身上，因為食客只要覺得餐牌所列嘅價目唔夠抵食，就冇興趣幫襯。
唔單止咁，因為港元跟隨美元長期貶值，導致輸港食材愈來愈貴，加上業主寧願將舖位空置都唔願意減租，電費排污等雜項支出又有加無減，實在令到經營者百上加斤。所以佢話政府制訂政策之時，真係要細心考慮以平衡勞資雙方嘅利益喎。