中環出更：「肥師奶」激瘦 鄧達智難忘
曾經効力國泰航空十幾年嘅中華電力企業發展總裁莊偉茵（Quince），多年來身形保持得宜，唔算肥亦唔算瘦。不過，同Quince相識多年嘅資深時裝設計師鄧達智（William）就爆料話，十幾年前大家初相識時，Quince曾經幾有肉地，事關當時佢啱啱生完細仔，好難瘦。冇耐國泰爆發激烈工潮，兩人再相逢時，Quince竟然激瘦咗三個碼，William至今難忘。
William嘅新店早前開張，作為老友嘅Quince當然要捧場啦，聽William爆出陳年往事，佢就笑笑口話，當年真係好肥，形容自己係「肥婆師奶」。工潮爆發確實令佢開始減磅，但直至一、兩年後，佢升任機艙服務總經理，需要管埋空姐，諗住以身作則Keep好身形，先至真正瘦咗落嚟。佢笑稱，同肥師奶時期相比，事實確係激瘦三個碼。
莊偉茵初次幫襯鄧
當日Quince心情輕鬆，話咁快就睇中一件靚衫，仲急不及待試上身。原來Quince同William相識咁耐，今次先至第一次幫襯，因為William北上發展十幾年，告別香港零售市場，Quince想買都唔得。不過，William今次重返香江，偏偏遇上租金勁升，好彩舖位業主以低於市面租金一半嘅友情價出租。雖然平租，但William都要拍住老友設計師劉家強一齊開店，分擔吓租金。
當日到賀嘅老友仲有新界鄉議局主席劉皇發嘅設計師囡囡劉玉蓮同老公余漢坤、名模馬詩慧及大女王曼喜等人，大家齊齊交流時裝嘅心得。
卓妮