今時今日咁嘅服務態度點得o架？呢句話平日用嚟鬧港鐵，今日港鐵及港府一齊鬧，又話檢討可加可減機制，又話承擔社會責任，點知港鐵票價一樣有加冇減，即係搵市民老襯啫，你話抵唔抵鬧吖！
新可加可減機制變新搵笨機制，唔止市民失望，立法會議事廳入面更加炮聲隆隆，議員怒轟新機制小修小補，根本改變唔到港鐵票價只加不減嘅現象，而港鐵提供嘅所謂票價優惠更加係小恩小惠，全部有姿勢，無實際，擺明糊弄市民。正如議員話齋，港鐵年年賺百億，仍然堅持年年加價，簡直係算死草。
當局點回應呢？港府官員話，喺新機制之下，港鐵有利潤就會提供票價優惠，呢個係長遠制度，社會唔應該攞上年港鐵一次性票價優惠嚟比較喎。而港鐵就聲稱今年加價百分之二點七，已經低於通脹水平咁話。
純屬狡辯，港鐵票價只加不減，而港產官僚嘅智商就只減不加，一味為港鐵加價護航，問你服未。正所謂發財要立品，以港鐵嘅盈利狀況嚟睇，根本應該減價至啱，而唔係加價吖，知冇！
功夫茶諗極都唔明，點解一間年年賺大錢嘅機構，仲要貪得無厭年年加價？點解唔可以凍結甚至減價呢？點解一定要做無良企業呢？而港府作為港鐵最大股東，點解要助紂為虐呢？
講來講去，都係可加可減機制累事。咁講啦，鬧機制小修小補又好，轟優惠小恩小惠又好，議員小來小去，其實都係講緊一樣嘢，就係所謂可加可減機制根本係廢嘅。港府當年煞有介事推出可加可減機制，原意係令票價調整透明化，迫使公共交通機構通縮時減價，可惜事與願違，由於香港年年通脹，加上機制天殘地缺，搞到港鐵唔止可以年年加價，更加係焗住年年加價添。可加可減變咗有加冇減，而且係唔加唔得，你話係咪荒謬吖？市民點會唔怨聲載道吖？
港鐵無良，加價最強，多得一套有加冇減搵笨機制，乘客只有任人魚肉。計功夫茶話齋，可加可減機制既然劣評如潮，好應該再檢討一次，今次好簡單，乜嘢利潤封頂，乜嘢參考家庭入息中位數，乜嘢票價優惠基金，全部都可以慳番。點樣做？咪就係索性取消可加可減機制，主要以港鐵嘅盈利狀況及市民負擔能力決定票價囉，乾手淨腳，一了百了，唔使小市民再畀港鐵予取予求呀！