香港嘅「廉潔奉公」金漆招牌已垮在貪曾貪遍省港澳的惡行上；而「肅貪倡廉」的ICAC形象，亦毀在貪曾「愛將」湯顯明的狂外訪勁送禮的敗德劣迹上，「香港勝在有你同ICAC」嘅正能量，經貪曾、湯顯明咁糟質法，正一係白鱔上沙灘——唔死都一身潺，真係該煨咯！
最近，審計署嘅報告又踢爆湯顯明身為廉署頭頭其身不正，任職期間竟巧立名目「大花筒」，好似前年舉辦一項國際性比賽期間，兩次晚宴開支超出批准上限，其中一餐超標逾一倍，同時揭發廉署為逃避開支限制，竟分拆帳單，把晚餐與甜品和十二瓶酒分開入帳！如此混帳，難怪立會帳委會擬聆訊事件，老朽絕對支持。
身為廉署阿頭不務正業做出咁荒謬嘅行為，唔單止令廉署蒙羞，廉署嘅廉潔形象更蕩然無存，「分拆帳單」更有欺瞞及不誠實嘅人格污點！
湯顯明在位期間，愛外遊勁送禮，又好飲飲食食，如此濫用納稅人嘅錢，認真離譜！更令人詬病嘅係，身為廉政公署阿頭咁多劣德敗行，而全港十多萬公務員就受到「防止賄賂條例」緊箍，小小過失都分分鐘會打爛飯碗，甚至惹上牢獄之災！之不過，作為阿頭嘅湯顯明，就不受有關條例規管，可以為所欲為，試問真正「廉潔奉公」嘅十多萬公僕情何以堪？
講開又講，○七年美國國會通過「牙籤法案」，呢份法案被戲稱為改寫了華盛頓嘅菜單，因為據其要求，國會議員在接受企業代表、說客的邀請赴宴時，酒會上所有的食品都只能用牙籤或者手指頭拿着吃，不得有正式的飯菜。對比廉署在湯顯明領導下，搞大型地區活動，美酒佳餚，酬酢超支，開餐亂篤數，在香港做廉署頭頭真係幸福過活在天堂！香港有貪曾和湯顯明，廉潔文化又豈能不蒙污失色！