新聞故事：萬千寵愛
尖東報檔明星貓「忌廉哥」熱爆全港，港九不少店舖飼養的貓狗亦是街坊寵兒。牠們有的四出逗人「冧」客、有的打造「超爆」造型、有的與店主共同生活，但都成為店舖生招牌，一舉一動牽動顧客，更與區內居民結下一份情緣。
北角書店 伴讀貓兒添閒情
「各位愛貓朋友，這裏是間書店，只不過是有貓相伴，千萬不要為玩貓而來，謝謝。」位於北角的森記圖書，近三十隻貓在店內生活，對店主陳琁來說，牠們不是寵物，亦非生招牌，只是共同生活的小生命，以店外告示表明心意。
「當初養貓只係為咗捉老鼠。」陳琁三十年前起在店中養貓，愈養愈多，「可以互相學習，有時你睇佢哋好專心食嘢，喺佢哋身上可以學識專注。」貓兒靜待椅上、櫃頂，讓店內散發一種閒情。
惟陳琁最怕有人當書店是遺棄寵物的收容中心，「佢哋（遺棄者）好唔負責任，以為啲貓會有人照顧，就心安理得，係一種偽善，我真係照顧唔晒。」她又謝絕以貓當生招牌，更不希望以貓帶動人流，「個個嚟玩貓，一來啲貓無機會休息，二來好多人見到啲貓會興奮尖叫，貓聽覺敏銳又細膽，咁大聲會嚇親佢哋。」從貓眼看世界，陳琁願所打理的書店，是生命間彼此顧念的小天地。
旺角電器店 公關老友記Coffee
「佢係我們嘅PR Manager（公關經理）。」西洋菜南街的環球電器燈飾店內，金毛尋回犬Coffee頸上掛有職員證，印上職銜及名字。店主兒子Alan說，為方便照顧，Coffee一歲時便帶牠回店，怎料成街坊寵兒，「唔少人帶零食畀佢，聖誕有禮物，新年仲有利是收！」店內貼滿Coffee與熟客合照，牠喜與人相處，跟小朋友尤其投契，可以幫手「照顧」小孩，讓家長專心選購，Alan稱讚Coffee令店內充滿生氣，更招來不少粉絲，是名出色店員。
Alan每年為Coffee寄出新年賀卡，○九年更在社交網站設立專頁，每日上載其照片，吸引過千粉絲關注。如今Coffee已十七歲，以人計算是百歲高齡，難如昔日在店內蹦蹦跳跳，但Alan說，Coffee仍熱愛工作，並有着一份使命感，「佢一返到舖頭就自動伸個頭出嚟戴職員證。」
大圍士多 街坊明星俏Dolly
今年八歲的北京狗Dolly在大圍積信街盛昌號士多看舖已六年，是名「資深員工」。士多老闆張先生道出Dolly的入行經過，「我哋一歲時開始養佢，但佢太情緒化，喺屋企成日發脾氣，就諗住帶佢去舖頭見識見識。」但Dolly一到士多，即憑着可愛外表「一炮而紅」，立時適應工作環境，絕無怯場，深受街坊歡迎。
憑着Dolly超卓的交際手腕，士多生意愈來愈好，「好多街坊特登走嚟買嘢，其實旨在同佢玩。」深得街坊寵愛的Dolly，近年更吸引專用髮型師為牠「執靚形象」，有時染粉紅，有時染紫色，顏色花哨又大膽，一身行頭以至衣食住行都有街坊贊助，「佢貪靚，好鍾意人讚佢靚，染完毛，會喺鏡面前轉來轉去。」張說，Dolly成功凝聚街坊之間的感情，「試過一次，成晚都唔見佢返屋企，我好驚佢走失咗，知道係髮型屋嘅人湊走佢，個心先定啲！」
圖：吳啟偉、崔祖佑
文：阮秀君、陳詠賢