寧做好黨內接棒工作
田少話，自己到下屆立法會選舉已經六十九歲，如果叫佢選超級議席，要搞埋區議會呢啲細眉細眼嘢會好辛苦，所以寧願做好黨內接棒工作好過。咁該黨會培育咩人選呢？田少好老實話，該黨確有同廠商會代表林大輝接觸，因為大家理念相近，但講到入黨就言之尚早。佢仲自爆該黨都有同謝偉俊有偈傾，但遲啲會點就冇人知喇。
另外，民建聯尋日舉行換屆選舉，結果一如早前傳聞般，主席由譚耀宗冧莊，五名副主席中有三人再度連任，分別係李慧琼、蔣麗芸同張國鈞，新當選嘅有沙田區議會副主席彭長緯同新界社團聯會理事長陳勇。至於常委亦有四張新面孔，包括陳克勤、「票王」北區區議員劉國勳、深水埗區議員鄭泳舜同觀塘區議員洪錦鉉。