政情：「拉得布嚟又驚死」立會預演口水戰
財政預算案拉布戰未開始，尋日立法會內務委員會就預先上演一場口水戰。大家最關心拉布戰期間使唔使通宵開會，有份拉布嘅梁國雄（長毛）就形容，議員通宵開會係自尋死路，要求立法會買定十個「心臟起搏器」，話「唔想啲同事死」喎。向來聲大大嘅蔣麗芸（Ann）就反寸長毛「拉得布嚟又驚死」，點知就被黃毓民回敬一句「關你叉事」。堂堂議員開會好似小學雞咁嗌交，認真羞家。
長毛叫買定心臟起搏器
人民力量三子因為去年一單非法集結案要喺本月廿九日上庭，其中陳偉業就要求當日上午休會。一向多口嘅長毛就話，休會可以等議員順便休息吓，又叫立法會買定「心臟起搏器」，因為「有啲人真係有病o架！」建制派被寸有病，王國興就反駁話，立法會應該按規矩辦事，唔可以只遷就個別議員。阿Ann亦反斥長毛又要拉布又怕死，仲叫拉布分子「垂危」時要出聲，咪搞到會議室出現「大吉利是」嘅事。
本身係醫生嘅郭家麒就提醒長毛、阿Ann、鍾樹根同通過波仔嘅財政司司長曾俊華要小心激動得滯爆血管，佢亦會帶定心臟起搏器以防萬一喎。
不過，立法會秘書處依家已經有六部同類儀器，睇嚟佢可以慳番喇。財經事務及庫務局局長陳家強就話，就算立法會真係通宵拉布，當局都冇後備方案，最多帶定睡袋去開會啫。