政情：楊受成獲頒中華慈善獎
英皇集團主席楊受成博士，再次獲頒內地官方獎項「中華慈善獎——最具愛心慈善捐贈個人獎」，係佢自○八年起，連續第五屆獲得呢項榮譽。楊博士尋日親自到咗北京，出席國家民政部喺北京人民大會堂舉行嘅「第八屆中華慈善獎」表彰大會，從民政部部長李立國手中接過獎項。
國務院嚴選 規格最高
「中華慈善獎」嚴格審定，由國務院直接領導下評選，係內地各類慈善領域中，規格最高嘅官方獎項。尋日大會亦同時宣布，即時成立第一屆「中華慈善聯合會」，並委任楊博士為常務理事。楊博士與部分獲獎者之後喺北京中南海，與國務院國務委員王勇會面，互相交流喺國內參與慈善事務寶貴經驗。