政情：鄭承隆 食得唔好嘥
我哋早前曾報道過新民黨喺新界西四出招兵搵區議員樁腳，點知尋日政府就宣布該黨嘅荃灣委任區議員趙公梃辭職，認真耐人尋味。聽聞趙公梃辭職另有內情，該黨如意算盤係想趁機安插副主席鄭承隆頂替趙公梃嘅委任議席，但如果政府再委任同一個黨嘅人，好容易引起區內其他政黨不滿。不過，鄭承隆就冇有怕，仲話樂意接受委任，估唔到佢連末代委任議席都食得唔好嘥，睇嚟佢都好恨做議員喎！
有地區人士話，趙公梃辭職嘅消息喺區內流傳咗成個月，咁啱得咁蹺，鄭承隆近月又喺荃灣非常活躍，搵咗成隊人陪佢企街派傳單，街板亦經常見到佢嘜頭，用「蠢蠢欲動」形容佢非常貼切。鄭承隆係仁濟醫院前主席，加入新民黨前已經好想從政，入黨後成為黨內大水喉，所以黨內人士都覺得佢野心唔細，唔會只想做區議員咁簡單，可能做委任議員只係佢部署嘅第一步，下一步分分鐘想染指立法會。
唔怕被批「世襲」
鄭承隆亦好老實話，自己服務咗荃灣區九年，對區內情況有一定了解，如果政府真係委任佢做區議員，當然樂意接受啦！至於怕唔怕被人批評該黨將委任議席「世襲」，佢話從來唔怕，因為區議員向來係有能者居之，政府自然會委任適當人選，似乎佢對委任一事好有信心。不過，政府已決定下屆全面取消區議會委任制，如果現時又因為空缺而委任新人選，會否被市民鬧爆開倒車呢？政府消息就話，取消委任制係下屆嘅事，如果依家有適當人選，都會再委任新議員補上喎。
此外，坊間傳言該黨「一山不能藏二虎」，指新入黨冇耐嘅鄭承隆同另一副主席田北辰不和，經常因為地區議題而嘈大交，鄭承隆亦一併否認，話自己咁努力做地區工作都係想協助田二少，點會有不和呢？咁啱該黨尋日換屆，做咗多年副主席嘅著名皮膚科醫生史泰祖退位，令該黨得番田二少同鄭承隆兩位副主席，究竟兩人會攜手合作吖？定係如外界傳聞所講明爭暗鬥呢？相信過多一排就會揭盅。