中環出更：「美容天后」辦大廚房送暖
卓妮日前喺博愛醫院董事局就職典禮上，見到最近擔任一個食物回收慈善機構社區廚房小組召集人嘅「美容天后」曾裕（Joyce），佢報喜話，已經喺屯門搵到二千呎地方搞個大廚房，預計五月可以投入使用。到時由各大食肆轉贈嘅新鮮食材就可以變成一碟碟美味餸菜，預計可為北區及屯門等區內弱勢社群提供愛心熱食喇！
白手興家 關愛基層
其實除咗曾裕領導一個小組之外，有關慈善機構仲有四個小組，所屬嘅召集人來頭唔小，包括新世界發展聯席董事總經理鄭志剛、恒基地產副主席李家誠、信和置業太子爺黃永光及美心集團第三代掌舵人伍偉國，白手興家嘅Joyce躋身其中，確係唔簡單。
其實多年來Joyce默默為基層市民送暖，六年前佢創辦「身心美慈善基金」，已喺屯門成立兩間社區服務中心，提供食物及情緒方面嘅支援，可能因為佢嘅愛心同埋實戰經驗，所以獲邀做小組召集人都未定。