中環出更：名人眼中 黃金風暴
最近金價暴跌，幾乎跌到成地都係眼鏡碎，市面掀起一股搶金潮。博愛醫院早前舉行新一屆董事局就職禮，城中名人講起係咪加入執金行列，大家各有盤算。升呢做副主席嘅吳錦青平時都會買金當投資，佢話今次跌市只係借勢調整，睇好遲啲仍會上升，入少少貨都冇問題。分管華懋集團投資業務嘅前博愛主席兼華懋執董李家松就話，黃金冇息收，大企業揸住冇着數，始終都係股票好。
李德麟：金市未入熊市
講到心情最複雜嘅，相信係金銀業貿易場理事長張德熙，事關搶金潮令行家啲實金存貨一日沽清，貿易場嘅成交量倍增。佢一直係黃金牛市大好友，幾時都睇好黃金投資前景，今次跌市已比高峰期跌咗三成，本周一喺一日內仲暴跌近一成，佢都跌晒眼鏡。佢又話，有四十幾萬張未平倉合約，係佢入行幾十年嚟第一次見。不過，佢仲未肯認輸，仍然堅持年底金價會由谷底攀升嘅預測。
出席另一場合嘅前理事長李德麟都好樂觀，佢話金市未進入熊市，暫未知金價何時見底，但認為目前已係低位，若長揸買得過。佢又話，歐美日各國經濟危機未解決，狂印銀紙只會進一步令通脹惡化，至今各國中央銀行都冇沽售黃金，可見黃金嘅儲備地位仍未動搖。
大女有喜 吳錦青笑晒
講番博愛嘅就職晚宴，吳錦青成晚笑瞇瞇，原來佢嘅大女吳嘉瑩（Alyssa）懷孕近五個月，預產期喺九月，將抱孫升呢做公公嘅佢，自然開心到笑不攏嘴。準媽媽Alyssa原本諗住大張旗鼓打造億元會所，但被突如其來嘅喜事打亂部署，惟有將工作放埋一邊，專心迎接BB誕生。
卓妮