禽者，鳥也，所謂禽流感當然唔止雞雞鴨鴨有機會傳播病毒，其他鳥類同樣係潛在嘅禍患之源。咁好嘞，假如你見到有一隻本應天上飛嘅猛禽巨鷹竟然陳屍地上，你會有乜嘢諗法呀？
功夫茶就會諗，香港斷估唔存在真人版射鵰英雄傳吖，冇可能有人一支箭將巨鷹射落地，即使確係有人罔顧法紀射殺受保護動物，都唔會將獵物棄置不顧。即係話，巨鷹陳屍地上話唔定係病死，致命原因不排除係令人聞風喪膽嘅新禽流感。
無端端為乜研究射鵰英雄傳？原因係咁嘅，有一位李先生由愉景灣行山至梅窩，途經稔樹灣赫然見到一隻疑似巨鷹物體攤於水道之上，李先生同功夫茶英雄所見略同，一樣認為咁大隻鷹唔似被打死，如果係病死而又關乎H7N9，咁就大大鑊嘞。身為良好市民嘅李先生於是致電政府熱線1823，希望有人執走鷹屍以策安全。不過好可惜，政府熱線原來係冷線，竟然空鈴長響無人接聽。心急如焚嘅李先生改為致電迪士尼警崗，要求警員轉介相關部門處理。跟住你估點吖嗱？日以繼夜再夜以繼日再日以繼夜，延誤三日之後，漁農自然護理署先至跟進，之但係跟進嘅時候巨鷹屍體已經消失得無影無蹤。事實再一次證明，漁農自然護理署嘅正確名稱係「愚弄自然烏厘署」，愚弄自然界嘅辦事作風非常之咁烏厘單刀。
講咗咁耐，功夫茶最想講嘅係，喂，H7N9禽流感好快殺到埋身喇，本地土產官老爺嘅防疫意識點可以咁鬆懈o架！
席捲內地嘅禽流感愈來愈得人驚，不但擴散得快，感染人數節節上升，而且國家疾控中心專家仲警告，上海已有兩宗家庭聚集H7N9病例，不排除病毒有限度人傳人。
咦咦咦，咪住先，五一黃金周即將來臨，內地同胞勢必浩浩蕩蕩湧到香港吃喝玩樂兼夾瘋狂購物，萬一其中有帶菌者，會唔會搞到好似十年前沙士蔓延咁大劑o架？商務及經濟發展局局長蘇錦樑尋日去到灣仔一間酒店，視察酒店業界對H7N9嘅預防同監控措施。局長大人話喎，已經向業界派發指引，要求酒店一旦發現懷疑個案，就將患者留於房間之內。
即係咁，功夫茶唔反對官老爺裝模作樣視察酒店，問題係要求酒店呢樣嗰樣夠唔夠呢？梗係唔夠啦，事關防疫工作必須把守好多重關卡，例如入境檢查，又例如醫院準備，再例如掃除雀屍，更加例如全城清潔搞衞生。從一隻鷹屍不聞不問足以證明，官僚把關不嚴，必須從速改善，否則大禍臨頭，禽流感瘟疫隨時殺人！