不再坐頭等住總統套房
對於貪曾任期尾聲連番被踢爆外訪豪住總統套房，據聞新政府去年七月上任以來銳意撥亂反正，首先特首身先士卒，外訪時帶頭唔坐頭等機位，其他高官亦乖乖「蕭規曹隨」。至於外訪住宿方面，超豪總統套房嘅住宿亦成為絕唱，事關港府高官會評估入住酒店等級嘅需要，有需要先會住各類型套房，但大原則係以節約為主。
此外，新政府另外一個顯著改變就係減少帶同隨員陪同外訪，就以早前有多名問責局長分別到內地多個省市訪問為例，如果係到北京、上海等地，該等地方本身已有香港駐當地人員，呢啲問責局長如非必要，連新聞秘書或政務助理等人手都索性唔帶，用番駐當地人員安排相關工作，相信喺少數怕長計下慳慳埋埋都唔少。