因為前觀塘坪石區議員陳百里加入政府而引發嘅補選下月二十六日舉行，自立法會議員陳鑑林囝囝陳俊傑喺本月十二日報名後，一直都冇人真正企出嚟挑戰呢個議席，但直到尋日提名期最後一日，竟然殺出梁國雄（長毛）報名參選。區議會選舉都要用好多錢喎，窮到燶嘅長毛已經因為連場官司而要畀幾百萬元律師費，依家仲要參選？
長毛就話，本來白鴿黨黨員徐百弟出選，佢就唔參加，但白鴿黨講明收兵，佢又睇唔過眼建制派當正嗰區係自己屋企自出自入，所以佢咪代泛民主派出戰囉。
至於點解由佢去參選？長毛話，佢哋內部曾商量過，任何人選都得，但佢嘅知名度較高，而且今次要打陳鑑林嘅票倉，所以由打慣建制派嘅佢出戰最適合不過。陳俊傑透過代言人話，無論邊個參選，佢都盡力做好地區工作，爭取居民支持。
長毛仲話，啲官司仍然有待上訴，但係佢話任何人都要對自己所做嘅事負責任，如果佢最後因為欠債而要宣布破產嘅話，香港就要嘗試吓冇咗長毛嘅狀況喎。