政情：愛港之聲話唔會企枱
近期多個支持政府嘅組織相繼冒起，既有愛港之聲、愛護香港力量（愛港力）、沉默之聲等，唔少論壇都見到佢哋蹤影，而愛港之聲決定自己搞論壇，下星期日會邀請各界探討政改發展。至於到時驚唔驚被其他組織踩場搞到腰斬，愛港之聲主席高達斌話冇有怕，事關佢哋一向坐定定，從來冇激烈行為，只係有小部分人控制唔到情緒。
邀建制派神秘嘉賓出席
高達斌仲話，現時咁多撐政府組織，公眾可能混亂，為咗令傳媒以茲識別，佢哋已經訂製百件愛港之聲制服，每逢任何活動都會叫會員着，咁就唔怕人誤會佢哋係其他組織，佢仲話愛港之聲成員唔會企上張枱。咁講法，莫非愛港之聲想同其他撐政府組織劃清界線，唔想扯上任何關係？
有關論壇將喺四月廿八日舉行，屆時邀請基本法委員會委員劉迺強、港大法律系助理教授張達明等出席，仲會邀請建制派神秘嘉賓添。愛港之聲非常高透明度，話說尋日有記者問愛港之聲財政狀況，高達斌即刻拎本數簿出嚟畀大家睇，話咁多個月來都係得十萬元捐款，絕冇左派團體捐錢畀佢哋喎。