政情：流會放生限奶令 議員爭姓賴

慢必突襲 自稱「盡責」

慢必因為要求點算開會法定人數而成為眾矢之的，佢尋日就澄清流會同佢絕無關係，又話自己只係盡責確保議事廳內有足夠人數，認為唔出席會議嘅議員應該為流會負上全責。至於今次點人數令「限奶令」原封不動自動通過，慢必話要求點算人數時冇考慮過限奶令呢個因素，又話大家應該譴責嗰啲唔在場嘅議員，而唔係搵佢做替死鬼。慢必講得真係輕鬆，因為佢嘅「盡責」，「限奶令」好多執法嘅灰色地帶都搞唔清楚。

不過，慢必就自爆，有公文袋議員多謝佢搞到立法會流會，令該黨唔使公開投票表態，可以蒙混過關。事關該黨嘅法律界議員郭榮鏗提出修訂要求完善配方奶粉定義，但如果不獲通過，該黨未必會對原動議投支持票喎。

其實今次流會，好多建制派議員都有份，好似商界林健鋒喺晚上七點左右就離開去食飯，仲有幾個議員去咗港區省級政協委員聯誼會就職晚宴；工業界梁君彥話自己病咗；而民記主席嘅譚耀宗（譚Sir）同航運交通界易志明就喺晚上九點半左右鬆人。

建制泛民編更防重演

立法會未拉布先流會，建制派尋日就同曾鈺成開會商討對策。譚Sir話，主席盡量將類似議案合併辯論，同埋動用主席權力不斷剪布，又話以防有議員再次突襲要求點算開會人數，已經同泛民達成初步協議，分別派出最少廿五人同十一人輪流出席會議，確保在席人數多過三十五人。

不過，自由黨已經表明唔會參與編更，加上如果到時有一至兩人因為去洗手間或者上寫字樓做嘢而唔喺會議廳，到時或會再次流會都未定。