中環出更：愛女英留學 雷禮權安心
香港教育模式向來惹人詬病，經過多番改革後依然問題一大籮。九巴董事雷禮權（William）就係一位對香港教育失去信心嘅家長，佢話經歷過留學英國嘅生活，相較之下本地嘅填鴨式教育真係不足取，所以佢好早就安排子女到英國求學，依家已學有所成，囡囡雷正殷仲獲音樂學院取錄添。
獲音樂學院取錄 主修鋼琴
William話，雖然香港教育不時改革，但學生嘅中文未有改善，而英文水平亦見遜色，佢話見過唔少具有大學程度嘅求職者，英文能力之不濟令佢大為吃驚，皆因香港流行單向灌輸嘅教學方式無助啟發學生。佢憶述十二歲以前喺香港受教育，於師長嚴厲督促下死記硬背，學業成績「包尾」，但當佢轉往英國讀書，受到同學間互相激勵，於寬鬆嘅學習環境下反而年年考第一。
因為有呢個切身體會，William早就安排一對子女往英國求學，結果佢囝囝雷正揚八歲就懂得古今歷史，今屆雙十年華於彼邦攻讀生化科技，去年暑假曾返港為港大微生物學專家袁國勇做暑期工。囡囡雷正殷就獲音樂學院取錄，主修鋼琴，William因而更肯定讓子女負笈英倫嘅決定。