中環出更：林偉強公職削減 商場得意
新界鄉議局副主席林偉強近年公職接連被「搣柴」，先係失落坪洲鄉事委員會主席，之後連帶離島委任區議員同離島區會主席位都冇埋，自此基本上佢只剩下鄉議局對內對外工作，但就多咗私人時間搞生意。原來佢有涉足房地產同汽車生意，卓妮尋日仲撞到佢同女兒，即有「離島之花」美譽嘅林穎妍（Esther）喺中環交收文件，唔通佢又有新生意諗頭，想事前諮詢吓愛女嘅意見？
卓妮尋日喺中環ifc寫字樓附近走廊，直擊林偉強同女兒短聚。話說下午二時半左右，林偉強喺走廊行來行去，好似等緊人咁款。就現場所見，佢一身便服打扮，右手拎住個公事包同一疊紙，左手亦有一袋疑似購物嘅戰利品，不時左望右望，警覺性甚高。事隔約十分鐘後，有個女士向林偉強方向趨前並且接過文件，睇真啲原來呢位女士就係佢女兒Esther，特首選舉期間就曾經流出一張Esther同候選人唐英年嘅合照。
涉足房地產汽車貿易
林偉強之後透露，佢依家同友人夾份喺馬來西亞馬六甲投資房地產，又一副專家口脗話馬六甲仲有潛力發展，因為相比泰國、菲律賓等國家，馬來西亞同新加坡等地治安較好喎，所以就投資玩吓囉！
當問到佢係咪將馬六甲嘅投資項目文件畀女兒睇時，林偉強自爆有關文件係內地汽車生意嘅文件，之後佢逗留約十五分鐘後就離開。
話時話，勢估唔到林偉強減少公職後，以為政治能量就會迅速下降，殊不知相反佢喺生意方面愈做愈大仲分布各地，所以世事嘅嘢真係好難講，但睇佢年前能夠力保鄉議局副主席個位，相信都有啲計嘅。
卓妮