中環出更：青聯開會 啟剛晶晶拍住上
前立法會議員霍震霆長子霍啟剛同「跳水公主」郭晶晶去年十一月結束八年愛情長跑，舉行世紀婚禮後再度蜜月回港，每逢出席活動都有影皆雙。身為青年聯會常務副主席嘅啟剛，近日忙於處理會務，而作為賢內助嘅晶晶，當然夫唱婦隨，擔任活動大使之餘，日前仲瞓身參與活動嘅籌備會議，實行夫妻檔拍住上，認真甜蜜蜜。
籌備「賢慧愛家日」
青聯同屬下嘅青聯賢慧社，將於下月喺海洋公園主辦第四屆「青聯賢慧愛家日」，邀請八百多個來自復康院舍嘅兒童及家長參與，旨在促進家庭和諧，以及宣揚社會共融嘅精神。日前啟剛兩夫婦同青聯主席葉振都、賢慧社召集人羅詠詩、活動召集人周沁齊齊開會「腦震盪」，計劃吓點樣將活動搞得有聲有色。
身為活動大使嘅晶晶話，覺得今次活動好有意義，期待活動當日同參加者分享經驗。卓妮覺得啟剛同晶晶呢對金童玉女，屆時孖住出嚟宣傳活動，肯定事半功倍，唔知晶晶有冇打算加入青聯大家庭，名正言順做老公嘅得力助手呢？