政情:愛孫百日宴 王國強開懷唱

廣東社團總會主席王國強(KK)最近連中兩個獎,除咗獲委任為政協專門委員會文史和學習委員會副主任,仲喜獲首位男孫Kaden,前晚喺酒店擺百日宴,爺爺KK high到極,全晚笑唔停。

KK大仔王紹基去年十二月初添男丁,全家上下喜氣洋洋,前晚豪擺近三十圍,賀孫兒Kaden出世。KK似乎對「K」字情有獨鍾,連孫兒嘅英文名都用「K」字開頭。喜宴上,KK抱埋孫女上台,大唱多首懷舊金曲,風騷到極,又逐一多謝近百位摯友,期間「貓紙」都唔使睇,果然寶刀未老。講到抱孫,KK話希望「陸續有來」,最好「五年抱三」咁話。

名人齊到賀

百日宴上嘉賓滿堂,除咗廣東社團總會嘅兄弟,仲有香港醫療專業人士協會主席江明熙醫生、東華主席陳文綺慧伉儷、女童軍總會香港總監彭徐美雲夫婦、同珍集團第三代掌舵人王賜豪等,十分熱鬧。話明係百日宴,枱上唔少得大碟紅雞蛋及酸薑,臨走時,每人仲有兩支朱古力雪茄添。

卓妮

第一手消息請下載on.cc東方互動iPhone/iPad/Android/Windows Phone Apps