又到各大慈善團體換屆交班嘅時候，我哋收到風，有位有錢人，啱啱被負責審查嘅政府部門拒絕加入某個善團，由於呢類個案好少發生，所以圈中人竊竊私語，爭相走告，原因耐人尋味。聽聞呢位仁兄以為坐定粒六，早前仲攜帶家眷出席該善團嘅籌款活動，並且出手豪爽競投拍賣品做善事，備受矚目，點知臨尾老貓燒鬚，不得其門而入。
本港慈善團體運作模式好特別，每年換屆一次嘅董事局主席、副主席及總理，其實同機構嘅日常運作及管理無關，董事局成員主要負責籌款，久而久之便成為富豪俱樂部。有人為名利而來，有人為洗底而來，形形色色嘅人都有，也不足為奇。
圈中人就成日私下議論某某人的背景，某某人如何發達，十分八卦。
最近各大善團已經陸續舉行主席印璽交接儀式，所以有啲新加入嘅總理以候任身份公開蒲頭，看似順理成章。但今次事件令大家上咗一課，以後真係要收到當局批文，先至畀新人公開張揚。今次又真係要讚吓負責把關嘅衙門，否則善團被人當作漂白工具，仲得了嘅？