政情：政總官員 過海搵食
金鐘添馬艦政府總部自從前年啟用以來，政府官員同公務員嘅搵食問題一直備受關注，據聞官場中人對成日要屈喺金鐘食午飯，食到開始有啲悶略有微言，既然見悶就開始「悶中求變」，最新一招更係跳出港島，過海到九龍搵食，聽聞官場中人搵食新蒲點，近則尖沙咀，遠則旺角甚至九龍站，貪呢啲地方食嘢夠多選擇，又唔使咁易撞到熟人喎！
自從政府總部同立法會搬咗去金鐘添馬艦後，兩個地方都分別開咗間新餐廳，方便喺兩個建築物返工嘅人食晏，情況最近開始有啲變化。首先講下政府總部嘅官場中人，佢哋為咗方便工作好多時都會約人去政總附近嘅中信大廈開餐，不過雖然中信一時間開咗多間唔同種類嘅食肆，繁忙時間仍然有人滿之患，價錢亦偏貴，所以官場中人開始搵開餐新蒲點，第一步係離開金鐘，轉戰中環、灣仔同銅鑼灣等地，貪佢哋喺港鐵沿線，有需要可即時趕返政總開會同做嘢。
官場中人另一招係過海搵食，近則尖沙咀，遠則旺角甚至九龍站，共通點都喺港鐵沿線，其中尖沙咀過海到金鐘只係一個站，一來一回絕不費時，食物同餐廳選擇都拉闊咗好多，有官場中人仲打趣話，只要唔撞到熟口熟面嘅人，去遠啲食都完全唔係問題。
立會餐廳逼爆 擬午飯禁訪
除咗官場中人八仙過海搵食，本報早前率先報道，有街外人去立法會門口拎張訪客證，睇準可以自由出入立法會圖書館之便，於是趁機偷雞去圖書館旁邊嘅餐廳開飯，據聞呢個包括中下層公務員同街外嘅白領，主要係貪立法會餐飯夠平又抵食，不過呢個就惹起一眾議員、助理投訴逼爆立法會餐廳，聽聞秘書處都睇到呢個問題日益嚴重，準備隨時出招做嘢。
消息指，第一招係中午食飯時間停止發放訪客證去圖書館，免得有人渾水摸魚入餐廳開餐，第二招係要行政署同意，一旦立法會餐廳開放畀公務員食飯，政總餐廳都要平等對待畀立法會中人進出。不過一句到尾，如果新政府連公務員食飯問題都解決唔到，點會得到公務員瞓身支持，新政府嘅當務之急，都係要快啲諗出一個兩全其美嘅搵食方法喇！