自從政府總部同立法會搬咗去金鐘添馬艦後，兩個地方都分別開咗間新餐廳，等職員可以行落樓下就有飯食。不過，除咗記者同持立法會證嘅官員外，其他公務員係唔可以隨便到立法會餐廳食嘢，反之立法會職員都唔可以喺冇政府職員帶領下去幫襯政府總部間餐廳。不過，最近有人發現立法會餐廳有外人自出自入，猶如無掩雞籠。
話說近期立法會餐廳喺食晏時段忽然多咗二十至三十人幫襯，但就唔係議員、立法會職員或記者。據了解，街外人只要去立法會門口攞張訪客證，就可以自由出入立法會圖書館，於是有唔少喺附近返工嘅白領就睇中呢個漏洞，攞張訪客證偷雞去圖書館隔籬嘅餐廳食晏。
據聞利用訪客證出入立法會餐廳食晏嘅多數都係政府總部職員，皆因政府總部嘅工作人數多過立法會好多，以致政府總部餐廳經常大排長龍，搞到冇啖好食，反而立法會餐廳要喺有會議開嘅日子先至多啲人幫襯，相對唔使排隊排咁耐，所以就有好多來人因利乘便借去圖書館嘅名義走入立法會餐廳食晏喇。