政情：公民講場：利益逐次報 議員怕麻煩

立法會負責審議印花稅（修訂）條例草案嘅委員會，由於涉及物業買賣，議員每次開會都要申報利益。點知議員陳鑑林怕麻煩，諗住一勞永逸，要求申報一次之後就唔使再申報，坐佢隔籬嘅地產及建造界議員石禮謙即刻同佢唱雙簧，話一定要申報，否則民主黨劉慧卿唔肯放過佢，暗示卿姐鍾意找麻煩，執得太嚴。由於劉慧卿唔在場，所以冇得回應。

其實議員要喺每次開會前申報利益，係行之有效嘅做法，如果申報完一次，以後唔使申報，咁啱陳鑑林同石禮謙申報完後又買賣物業、甚至摸貨，外界根本無從得知，如果佢哋從中獲利，後果就更加嚴重，成個利益申報制度崩潰。如果覺得次次申報麻煩又浪費時間，當初為何加入有關委員會呢？

第一手消息請下載on.cc東方互動iPhone/iPad/Android/Windows Phone Apps