今屆立法會多咗一半新議員，淨係記名都有排記，之前仲有人因為記錯新議員而搞出唔少笑話。不過，原來唔止新人難記，舊人都一樣有人記錯。尋日立法會政制及內地事務委員會會議上，當時大家正喺度討論選民登記制度時，委員會主席譚耀宗（譚Sir）一時口快快，將工業界林大輝叫錯做「林文輝」，搞到做咗五年議員嘅大輝攤大手板大嘆無奈。
聽到共事多年嘅譚Sir叫錯自己個名，大輝即時寸爆話：「嘩，做咗咁耐同事都唔記得我個名！」大輝之後仲趁機大吐苦水，話工商界功能界別議員認受性低，周不時都會覺得無奈兼唏噓。佢仲呻話，外界經常矮化功能界別議員嘅貢獻，覺得佢哋冇代表性，但其實並唔係佢哋做得唔好，只係歸因於選民人數太少，小圈子選舉代表小圈子利益。佢建議政府擴闊功能界別嘅選民基數，令直選議員都認同佢哋嘅民意授權喎。
見到大輝好似怨婦咁款，譚Sir只好講番聲對唔住之餘，亦都提醒大輝「唔好自我貶值」。盛傳已經加入咗公民力量嘅大輝下屆將會轉戰新界東直選，唔知佢尋日呢三分鐘嘅告白，係咪銳意行直選路嘅原因呢？